今日警察正式控告我非法集結（另見報道），一月二日上庭。相比起近來發生嘅事，我心情相對輕鬆。從第一日決定要成立政治組織宣揚獨立時，我就知道呢一條唔係易行嘅路。由雨傘時期到今日，我認為我嘅熱血同對香港嘅想像係無改變到，變嘅係我對政圈嘅睇法。

仲記得以前會因為一個高登post，幫人通宵搵狗，因為一個高登post, 唔返工去幫人助選，因為一段錄音而走上街頭抗爭。嗰種熱血並唔單止係做自己認為啱嘅事，我更加想嘅係俾受苦或者孤獨嘅人知道，佢哋並唔係自己一個。

成立組織時亦有同一種想法。當時獨派俾人認為係鬼，青政被人DQ，梁天琦亦準備入獄。一般雨傘後青年唔再相信政治，更加唔敢想像香港嘅未來，隨之而來就係年青人自殺潮。 當時嘅我，好想話俾社會知，即使支持香港獨立會被打壓，無公司敢聘用，被選舉權會被剝奪，仍然會有人走出嚟。我想話俾想改變社會嘅年青人聽，你哋並唔孤單。

期間，呢份熱血驅使我做咗好多好戇居嘅事。但每一次我都提醒自己唔好被人感染，要保持自己正直嘅心。因為呢個圈子充斥住光怪陸離嘅人，你唔知道邊個隨時出賣你，有幾多人有目的咁滲透，再係你背後做唔同嘅攻擊。當被攻擊一段時間，人就會攰，攰就會沉思，但當每次去到最後最後，當問自己嗰一句「值得咩？」

我嘅答案都係一樣：「 無乜嘢比起改變香港嘅將來更有意義 」

呢一場運動，整個世代都獲得政治覺醒，比雨傘，我哋學識咗團結嘅保貴，但呢一場運動令好多人放棄咗獨派。對於獨立，呢段時間聽得最多嘅係「我支持獨立，但而家暫時唔係時候宣揚」「擔心會影響國際戰線」等等。潛移默化後，有好多本來支持獨派嘅人士變得沉默，參選人亦盡量避免與獨派接觸。其實佢哋嘅難言之忍我係好理解，只可以話政府對我哋嘅孤立好成功。

對於獨立嘅理念，我係從來無改變，而將來亦唔會。面對今日共產政權嘅恐怖統治，每日都有棄屍，數百名年輕人不明失蹤，無數人被黑警嚴重傷害，我哋根本無辦法扮作正常繼續係度生活落去。而見到眼前一群對香港有想像，有熱誠，不計付出嘅年青人，佢哋更加值得擁有一個民主，有本土獨特文化嘅國家，因為佢哋會為呢個國家創造一個輝煌嘅時光。

自六月以後，身邊幾乎每一個群組都有朋友被捕及受傷，亦有無數朋友犠牲咗工作同學業前途，甚至有朋友吸入二噁英後病重去世。呢一啲事件成為咗我哋唔可以放棄嘅原因。比起政圈，我認為手足們更崇高及值得尊重。佢哋唔會為上位討好位何人，唔會搏曝光而炒作新聞，唔會每一步都計算政治利益，呢一群先係真心為香港嘅人。

請各位好好記住呢一群已經犧牲甚多嘅人，當大家攰，漸漸停落嚟，清算就會一一發生。無論以後發生任何事，請各位堅持落去，直至我哋喺煲底相見。