午饭时分，在置地广场水池碰到年轻校友C，佢话等紧另外一位校友去Five Guys食汉堡包，渠地当然系由细到大食麦当劳慨一辈人，不过都已经大学毕业十几二十年咯，有资格在告罗士打大厦及约克大厦返工，食汉堡包当然升呢，去万年大厦地库帮衬Five Guys啦。

问吓渠：「你地一班三十几四十岁慨人依家有乜好谂？」校友C话：「我以前上过蔡子强慨堂，渠早几日在明报讲『时不利兮骓不逝』！生存下去就是胜利。都几无可奈何，自然有啲泄气，但今日形势比人强，自己又有咗一个五岁女，真系觉得生存下去就是胜利。等阵同昔日宿舍同房去Five Guys，佢话想倾吓好唔好揸BNO移民英国，问题好多，不知从何说起。」语气果然几灰，老师兄左丁山有乜好讲呢，唉！顺口问吓渠有冇睇过校长段崇智及校董会主席梁乃鹏及九位中大书院院长联署慨声明，校友C话：「冇认真睇过，只系读报纸报导。又系嗰句话啦，形势比人强，中大发出一份咁慨声明，一定经过内部反覆讨论，要起码11个人同意先至可以发布慨声明，一定系要追求平衡或者写到面面俱圆慨嘞。学生可能会闹校长，啲极左派又可能继续大骂校长点解唔向警察道歉，你叫校长怎么办？极左派根本系想利用警察嚟逼校长辞职，好等校监（特首）发挥影响力，叫中大学港大，搵一个翻版张翔嚟做中大校长，咁就舒服晒。中大忍辱负重，能维持目前现状下去就是胜利。」

校友C谂到好多嘢噃，如此人才，竟然可能揸住本BNO去英国面对不可知之将来，几令人伤感。特区政府与中联办秉承上意，大骂英国不安好心，违反中英联合声明精神，以政治遮掩向香港人收取经济利益，都几令人莫名其妙，要移民之人，显然唔系习主席口中之「爱国者」啦，渠地走晒，特区政府唔系更加安乐咩？至于移民为英国带来经济利益，直情系啦，有乜好闹，马尔他、加勒比海等国家公然卖护照（以投资移民为名），又唔见林郑出声批评？年青人明知英国经济差、疫情差、搵工难，而仍然想去试一试，所为何来，孰令致之，林郑肯唔肯谂一谂？