2020/07/13

今晚又想起這張相，由《明報》記者於 2014 年 9 月 29 日凌晨 4 時所攝 — 即「佔中」不如戴耀廷所預期卻以更好、更大規模發生後。

類似的事，之後重覆發生了許多遍：

2014 佔中
2016 雷動（a bit controversial, though）
2018 風雲計劃（即 2019 區選填白區）
2020 民主派初選

每次的流程都是 — 戴提出某天馬行空的 idea → 全世界 O 嘴 → 戴慢慢解釋 → 全部人話佢天真 → 戴繼續做 → 結果計劃不如佢預期般進行，但目標卻又唔知點解地達成了。

這些年訪問過戴很多遍，感覺他似乎慢慢地接受了自己這個角色。

2017 年提出風雲計劃時他說，「我一路都係做緊一個孤獨的推銷員，不斷推銷新的 idea ……」當然會被質疑，喂得唔得呀，他會答，「成唔成功有時不是最重要，過程中你看到一些原本覺得沒有希望的人，願意一齊再去試，這是最值得開心的地方。」有些人笑他天真，好多人。

風雲計劃最終頗為失敗，只找到四五十「風雲救兵」（唔記得名號了，總之老土）受訓後填白區，怎料反送中爆發，人人自動埋位，戴的計劃又「成真」。

然後他又提出初選。今年初訪問，問佢，喂初選 work 唔 work 呀（下刪十萬個質疑），他這樣答：

「搞咗咁多次，計劃就係咁計劃，但啲嘢唔會跟計劃，會有變化。變化係點就控制唔到，但每次變化出來總係比我想像更好，所以我預個勢係應該有機會。」

某程度上，這個戴耀廷已經不稱之為「天真」，而是有種不知從何而來的信心（有人補充：是信仰）。

數月後，初選在眾籌、器材都唔夠，加惡法壓境下順利舉行。兩日逾 60 萬人投票，較原先目標多兩倍多，跌破事前所有人（包括戴）的眼鏡。

老實說，投票只是選舉協調的第一步，之後還可以有很多問題出現（今時今日選舉還有否意義亦成疑問啦其實），但看到這兩天各區票站的「黃人龍」（區諾軒語 = =），恐怕戴耀廷又要感動哭了。

對了，他的信心不是不知從何而來，而是來自香港人。由 2013，到 2020，一直都是。